شعر ترکی فوق العاده زیبا

 زهرا بالاسی شخص ریاکاری بینمز

بعضی بشرین دهریده یوز صورتی واردی

 الله بولوری قلبیده نه نیتی واردی

بیرگون گوروسن جبهه شیطانه طرفدی

 بیر گون گوروسن شاه شهیدانه طرفدی

بیر گون گوروسن تابع اولوب کفر و نفاقه

 بیر گون گوروسن قاره گئییب باشدان ایاقه

بیر گون گوروسن آجر آتیر کاخ یزیده

 بیر گون گوروسن داش داشییر قبر شهیده

قیلمیر ایکی رکعت نامازین هفته به هفته

 جمعه نامازیندا دایانیر اول صفده

انساندا کی مین رنگ اولا انسان دئماخ اولماز

 مین رنگلی انسانه مسلمان دئماخ اولماز

لعنت گله بیر شخصه کی بنیان وجودی

 ظاهرده مسلمان اولا باطنده یهودی

آه ای کی علی شیعه سیسن مین یولا گئتمه

 شخصیتیوین دامنینی لکه لی ائتمه

تزویر ائلمه خلق پراکندیه خاطیر

 الله گوره سعی ائله نه بندیه خاطیر

احسان وئریسن تا کی آدین دیللره دوشسون

 داراییوین آوازه سی محفللره دوشسون

بیر کس بوله همسایه نین آذوقه سی کمدی

 والله اونون احسانیده اسلامه ستمدی

تشریح ائله انگیزه احسان ندی سنده ؟

بو بخشش و بو بذل فراوان ندی سنده ؟

سعی ائیلییسن مهر حسین، دونمیه قهره ؟

یا ثروتیوی گورسدیسن مردم شهره ؟

اما بونی بول یار اولان اغیاری بینمز

زهرا بالاسی شخص ریاکاری بینمز

یوز یول گئدسن مکیه گر پول ربادن

مین یول دولانیب یول سالاسان مروه صفادن

احرامی اگر قامتیوه باغلیاسان سن

 یوز دفعه بقیعده اوتوروب آغلیاسان سن

چون قلبیوه نور عملین تابشی یوخدی

واللهی او حجین توکو جان ارزشی یوخدی

فانوسه نه حاجت او زامان کی گونوز اولسا

انسان اوزی بیر کعبه دی اعمالی دوز اولسا

هر قلب کی پاک اولسا اوزی قبله نمادی

بیر نیمه سی مروه او بیری نیمه، صفادی

هر قلبیده آئینه کیمین اولماسا لکه

 گر یاخشی گزیب آختاراسان، اوردادی مکه